Соңғы қоңырау сыңғыры

Балауса балғын шаққа «қош» дегізіп, соңғы қоңырау сыңғыры, қағылған өмірдің күмбіріндей мектеп бітіруші түлектерге ерекше әсер қалдырды. Еліміздегі эпидемиологиялық ахуалға байланысты көп мектептерде соңғы қоңырау соғылмады, үлкен өмірдің табалдырығын аттаған түлектер үшін оңай болмады.
Күні кеше ғана кішкентай балақандар, енді мектеп партасымен мәңгілік қоштасып, үлкен өмірге қанат қағар алдында тұр. Әр қайсысының жанарында – жас, көңілдеріндегі – қимастық сезімі білініп-ақ тұр. Бұл күні талапкерлер өздерінің 11 жыл тәлім терген тарыдай шәкіртен, таудай азамат пен азаматша болғандарын сезінгендей. Биылғы жылы мектебімізде барлық санитарлық талаптарға сәйкес 9-11 сынып оқушыларына 25 мамыр салтанатты жиыны ашық алаңда өткізілді.
Мектеп бітіруші түлектер үшін бүгінгі соңғы қоңыраудың үні ерекше.Бұл мереке олардың мәңгі естеріңде қалатын, қайталанбайтын, сағынышпен еске алып жүретін, балалық шақпен қоштасып, үлкен өмірдің алғашқы баспалдағына аяқ басар сәттері. Енді санаулы күндерден кейін 11 жыл бойы білім, тәрбие берген аяулы ұстаздарымен, алтын ұя мектептерімен қоштасқалы отыр. Қазір олардың алдарыңда үлкен сын ҰБТ сыны тұр. Сол сыннан сүрінбей өтіп, әр қайсы өздерінің қалаған мамандықтарының иесі болуларына шын жүректен тілектеспін. Мен мектеп түлектерін әрдайым биіктерден көргім келеді.